నూతన వ్యవసాయ చట్టాలను వ్యతిరేకిస్తూ రైతు సంఘూలు తలపెట్టిన భారత్ బంద్కు అన్ని వర్గాల నుంచి మద్దతు లభించింది. దేశంలోని అన్ని రాష్ట్రాల్లో నిరసనలు వెల్లువెత్తాయి. దాదాపు 25 రాజకీయ పార్టీలు, రైతు, కార్మిక సంఘాలు ఆందోళనలు నిర్వహించాయి. రైతుల డిమాండ్ మేరకు సాగు చట్టాలను కేంద్రం వెనక్కి తీసుకోవాలని నినదించాయి. పలు చోట్ల రైల్ రోకో నిర్వహించి రైళ్ల రాకపోకలను అడ్డుకున్నారు నిరనసకారులు.
మహారాష్ట్రలో..
భారత్ బంద్కు మద్దతుగా మహారాష్ట్రలోని 'స్వాభిమాని శెట్కారి సంఘటన' రైతు సంఘం రైల్ రోకో నిర్వహించింది. బుల్ధానా జిల్లా మల్కాపుర్లోని రైల్వే స్టేషన్లో ట్రాక్పై ఆందోళనలు చేపట్టింది. ఓ రైలును బయల్దేరకుండా నిరసనకారులు అడ్డుకోగా.. రంగంలోని దిగిన పోలీసులు వారిని అదుపులోకి తీసుకున్నారు.
ఒడిశాలో..
రైతులకు మద్దతుగా ఒడిశా భువనేశ్వర్లో రైల్ రోకో నిర్వహించాయి వామమక్షాలు. భువనేశ్వర్ రైల్వే స్టేషన్లో రైళ్ల రాకపోకలను అడ్డుకున్నాయి. కార్మిక సంఘాలు, రైతు సంఘాలు ఇందులో పాల్గొన్నాయి.
కర్ణాటకలో..
భారత్ బంద్కు మద్దతుగా కర్ణాటకలో కాంగ్రెస్ నేతలు ఆందోళనలు నిర్వహించారు. బెంగళూరు విదాన్ సౌధ వద్ద గాంధీ విగ్రహం ముందు నల్ల జెండాలు పట్టుకుని నిరసన వ్యక్తం చేశారు. నూతన సాగు చట్టాలను కేంద్రం వెనక్కి తీసుకోవాలని డిమాండ్ చేశారు. కాంగ్రెస్ నాయకులు సిద్ధరామయ్య, బీకే హరిప్రసాద్, రామలింగా రెడ్డి ఈ నిరసనల్లో పాల్గొన్నారు.
కర్ణాటక కలబురిగిలో వామమక్ష అనుబంధ సంఘాలు ఆందోళనలు నిర్వహించాయి. రోడ్డుపై బైఠాయించి నిరసన వ్యక్తం చేశాయి.
బంగాల్లో..
బంగాల్ రాజధాని కోల్కతాలోని జాదవ్పుర్ రైల్వే స్టేషన్లో వామపక్షాలు ఆందోళనలు నిర్వహించాయి. భారత్ బంద్కు మద్దతుగా రైల్ రోకో చేపట్టాయి. నూతన వ్యవసాయ చట్టాలను కేంద్రం వెనక్కి తీసుకోవాలని డిమాండ్ చేశాయి.
బిహార్లో
బిహార్లో ప్రతిపక్ష ఆర్జేడీ.. రైతులకు మద్దతుగా ఆందోళనలు నిర్వహించింది. దర్భంగాలోని గన్చౌక్ వద్ద టైర్లకు నిప్పంటించి నిరసన వ్యక్తం చేశారు ఆ పార్టీ కార్యకర్తలు. భారత్ బంద్కు మద్దతు తెలిపారు.
దిల్లీలో బందోబస్తు..
భారత్ బంద్ నేపథ్యంలో దిల్లీలో భారీగా బలగాలను మోహరించారు అధికారులు. సరిహద్దుల్లో భద్రత కట్టుదిట్టం చేశారు. సింఘు, టిక్రీ, ఘాజిపూర్ సహా పలు దిల్లీ సరిహద్దు రోడ్లను మూసివేశారు.
